Brendinqdə müxtəlif çalarların dili

Qırmızı – diqqəti dərhal üzərinə çəkən bir rəngdir. O, güc, enerji, ehtiras və həyatın sürətli tempinin rəmzi sayılır. İştaha açmaq qabiliyyətinə malik olduğu üçün qida brendləri çox vaxt qırmızıdan əsas rəng kimi istifadə edir. “McDonald’s”, “KFC”, “Coca-Cola” kimi brendləri yada salaq.

Qırmızı rəngə avtomobil markalarında da rast gəlinir. "Mitsubishi"nin loqosundakı qırmızı yapon mədəniyyəti ilə əlaqəlidir. Qədimdən bəri yaponlar bu rəngin şər qüvvələrdən qoruyaraq uğur gətirdiyinə inanıblar.

"Toyota" markasının istifadə etdiyi qırmızı həyəcan, inam və enerjini bildirir. Amma unutmamalıyıq ki, qırmızının həddən çox olması qıcıq və hətta aqressiya doğura bilər.

Narıncı rəng kreativlik, bayram əhvali-ruhiyyəsi və ünsiyyətliliklə əlaqələndirilir. Brendlər ondan həm də insanları səyahətə həvəsləndirmək üçün istifadə edir. Dünyaca məşhur "Harley-Davidson" motosikletlərinin loqosu buna bariz nümunədir.

Hədəf kütləsi uşaqlar olduqda parlaq narıncı uğurlu variant hesab edilir. Ucuz göründüyü üçün narıncının bəzi çalarları bəzən məhsulun əlçatanlığından, qiymətinin aşağı olmasından xəbər verir. "Trendyol" internet mağazasının dizaynı hamımıza tanışdır.

Yaşıl rəng məhsulların təbiiliyini, ekoloji cəhətdən təmizliyini və eləcə də təbiətə yaxınlığını vurğulayır. Ondan, adətən, tibb və kosmetologiya sahələrində istifadə olunur. Çox vaxt sağlam həyat tərzi və düzgün qidalanma məhsulları üzrə ixtisaslaşmış şirkətlər öz loqolarında yaşıl rəngi tətbiq edir.

Günəşi xatırladan sarı rəngdən marketinqdə sevinc, rahatlıq və xoş əhval aşılamaq üçün istifadə edilir. Uşaq məhsulları, istirahət, əyləncə və səyahət sahələrində ona tez-tez rast gəlinir.

Sarı ilə qaranı əlaqələndirərkən ehtiyatlı davranmaq lazımdır. Bioloji və ya radiasiya təhlükəsindən xəbər verən nişanlarda istifadə olunduğu üçün belə bir rəng kombinasiyası şüuraltı qorxu hissi yarada bilər. Buna baxmayaraq, "Nikon" şirkəti dizaynda qara və sarı rənglərin birləşməsindən yararlanmaqdan çəkinməyib.

İngiltərə kraliçası I Elizabet 1533-1603-cü illərdə özü və kral ailə üzvlərindən başqa kiminsə bənövşəyi rəngdə libas geyinməsini qadağan etmişdi.

Bir vaxtlar "kral rəngi" hesab olunan bənövşəyi lüks, incəlik və fərqlilik ilə əlaqələndirilir. Brendlər bu rəngə dizayna dəbdəbəlik qatmaq və ya öz xüsusi keyfiyyətlərini vurğulamaq üçün müraciət edirlər. Məsələn, məhsulunun zərif dada malik olduğunu qeyd edən şokolad markası "Milka" bu zərifliyi məhz bənövşəyi rənglə ifadə edib.

Göy ən neytral rəng sayıla bilər. Göy rəng həm kişilər, həm də qadınlar tərəfindən eyni dərəcədə bəyənilir. O, sakitlik və etibarlılığı simvolizə edir. Səyahət sənayesindən tutmuş yüksək texnologiya sektoruna qədər göy və ya mavi rəngdən hər yerdə istifadə olunur.

Məsələ qida ilə bağlı brendlərə gəldikdə isə vəziyyət dəyişir. Mavi rəng iştahanı qaçırdır. Göy rəng həm də məşhur sosial şəbəkələrin rəsmi rəngidir.

Qara rəng çox vaxt bahalı məhsullara aid edilir. O, mürəkkəbliyi və eksklüzivliyi vurğulayır. Amma eyni zamanda "qaramat" əhval yaratdığı üçün hədəf auditoriyası uşaq və ya yaşlı insanlar olan markalar qara rəngdən nadir hallarda istifadə edir. "Adidas", "Nike", "Sony" kimi məşhur brendlər dizaynda sadə qara rəngə üz tutublar. Məhsullarının keyfiyyətinə güvəndikləri üçün onlar parlaq rənglərlə insanları cəlb etməyə ehtiyac duymurlar.

Məşhur ətir brendləri və moda evləri daha çox ağ-qara loqolara üstünlük verir.

 

Müəllif: Zöhrə Yusubova